Berita Pemerindang minggu tu
datai baru begulai enggau penyanyi ke terubah iya popular enggau lagu Anak
Umbung ba album Anak Umbung ti dikeluar dalam taun 2001 nyin suba.
Rickie Andrewson nya seiku ari artis ba Andrewson Ngalai Production (ANP) Miri,
siti kompeni ditumbuhka apai iya empu, Andrewson Ngalai (diatu Tuai Rumah
Andrewson Ngalai), seiku penyanyi ke pemadu iya tebilang era 90-an enggau lagu Danji Tua Nyadi Ampa.
Ari segi populariti, Rickie
Andrewson tau enda ibuh kelalu dicheritaka kitai laban iya udah ditemu sereta
dikelala semua lalu nambahka nya iya mega udah kala bulih anugerah Vokal
Terbail ba Anugerah Juara Rentak Ruai (AJARR) Cats FM 2010 suba. Rickie
Andrewson ukai semina tebilang enggau album solo tang iya mega pegari ba album
duet enggau album kompilasi begulai enggau penyanyi 'sensasi' Melissa Francis,
Winnie Albert, Julita James, Meldelyne Mel enggau artis ANP ke bukai.
Sekumbang lebih kurang sepuluh
taun udah begelar artis, Rickie Andrewson udah ngeluarka mayuh album lalu nyau
ka semua album nya 'meletup'. Sekeda ari lagu iya ke tebilang iya nya Siti Penanggul Entara Tua, Lagu
Lama Aku Suba, Engkerecham Chuka, Tepawah Runding (duet enggau Winnie Albert), Pengerindu Ba Ujung Cherita,
lagu berentak poco-poco enggau mayuh ke bukai.
Gosip & 'Kritikan'
Artis
Gosip enggau 'kritikan' udah
chukup sebau (sinonim) enggau dunya artis. Iya topik ke nyadi daya penarit ke
tepapar ba media chelak enggau media elektronik lalu iya mega utai ti dianti-
anti bala peminat kelebih agi cherita ke bisi besangkut paut enggau artis ti
dikerinduka sida. Taja pan pia, 'kritikan' bebida ari gosip laban 'kritikan'
madahka utai ke agi bisi selepak endur mantah lalu beniat ngemetul ngambika
orang di kritik nya enda nandu penyalah ke sebaka. Gosip mega bisi niat ke
manah tang enti iya semina gosip sengapa tempa, iya tau ngemalu, ngemaruh serta
ngelabuhka imej siku-siku artis.
Rambai jaku - enti enggai
basah, anang bemain semak pantai - nya tau dikumbai siti lalau ngagai orang ke
deka nyadi artis tauka sida ke gawa ba industri pemerindang. Kebuah pia laban
dunya pemerindang, gosip enggau kritikan udah nyadi siti 'resipi' ke mesti lalu
enda tentu ulih diseliah kelebih agi enti artis nya artis ke popular tauka
'glamour'.
"Gosip semina berita
angin, bedau tenty amat tauka enda. Gosip ulih mantu lalu tau mega ngerusak.
Enti ulih, anang meh ngaga gosip ti kelalu mangki batang tubuh artis laban
mayuh perkara bukai ke patut agi dipekunsika enggau bala mayuh" ku Rickie
Andrewson ba komen keterubah iya pasal gosip.
Ngenang gosip ke bisi didinga
nyadi ba batang tubuh iya maya ke diatu, Rickie Andrewson madahka diri enggau
naka ulih enggai ngemanaka gosip nya. Kebuah pia ku iya laban orang ke begelar
artis tetap bisi maya kena rimbas tauka sembur tempias gossip enggau kritikan
enda ngira pun penatai laban dunya kitai diatu udah dikuasa macham-macham media
ke nadai sekat enggau adan.
“Artis ke lebih profesyenal
ulih nerima gossip tang sekeda enda. Gosip ti enda profesyenal tau ngerusak
serta ngelabuhka imej artis. Manah amat enti sida ken gaga gossip nya betanya
dulu ngagai orang ke ngempu tubuh laban diatu udah mayuh teknologi kena kitai
betanyaka utai ti bendar ari pangan diri”, Rickie Andrewson enggau penuh
pengarap minta orang ken gaga gossip enda ngaga cherita ke nyelabu ngapa.
Nyaut siti berita angin ti
madahka iya bisi ‘skandal’ enggau seiku penyanyi indu ke sama enggau iya ba
ANP, Rickie Andrewson madahka diri enggai kelalu bejaku mayuh pasal perkara nya
tang manah agi bala peminat iya macha gossip nya ba blogspot iya empu
rickieandrewsonngalai.blogspot.com.
“Sekumbang gossip tu udah ayan
ba facebook, aku nyau suntuk penemu endur nerangka utai ti bendar, Orang mudah
pecaya serta rindu agi mendingka cherita ke bedau temu pun ujung. Anang meh
semina mendingka cherita ari sepiak aja. Gosip ke bansa tu mai pemalu ngagai
siku-siku orang kelebih agi ba kami duai ke sama udah bisi ruang bilik Kediri.
Iya ti bendar, aku enggau ‘MM’ nadai kaul lebih ari ke patut tang semina bekaul
entara artis enggau artis ba siti kompeni ke sebaka. Udah tu, aku arapka bala
peminat badu pechaya ke gossip nya laban
iya semina gossip ke sengapa rembang”, ku Rickie Andrewson enggai beterus
terang nyebut nama artis indu nya laban agi deka nyaga nama pangan diri.
Ditanya nama utai ti pemadu dikearapka
iya pengudah berita tu dibacha semua, Rickie Andrewson arapka nadai agi berita
angin enggau gossip ke sengapa tempa pasal seduai iya. “Aku berasai kesal lalu
ulih mega ngasaika pangka gossip tu ba ‘MM’ kelebih sida iya sebilik ke enda
nemu ulu ili. Taja pia, aku mgasai nadai utai ke endur aku patut minta ampun
laban aku sigi enda besalah. Aku enggai nanggung penyalah ke ukai digaga aku”,
ku rickie Andrewson madah enggau abis pengarap lalu minta semua pemacha enda
mendingka berita ke berat sepiak.
Wooww.. sigi udah gaya dunya
artis. Makin popular artis nya, makin mayuh ga gossip malut iya. Taja pan pia,
kitai arapka semua penyaru tau padam tekala tu laban cheregey ke bepun ari
gossip nadai nyadi kini-kini lalu tambah mega dunya pemerindang kitai di Sarawak
tu enda besai lalu nyau ka semua kitai bekelala enggau pangan diiri. Kitai
arapka Rickie Andrewson tetap besabar laban gossip enggau ‘kritikan’ sigi udah
nyadi asam garam dunya artis. Enggai tauka deka, kitai enda ulih enda nerima
‘hakikat’ nya semadi meh kitai nyurutka diri ari dunya pemerindang.
Industri Muzik Di Sarawak
“ Industri muzik kitai makin
maju. Sekeda artis kitai udah ngembuan pelajarka tinggi lalu bisi mega ke udah
bulih degree ba bidang muzik. Penemu sida lebih kreatif sereta nyelai (unik)
ari ke dulu suba lalu nya dikena sida ngangkatka kualiti muzik enggau lagu.
Sida meh ke mai ‘revolusi’ ngagai industry muzik di Sarawak. Tang taja pan pia,
industry muzik kitai enda ulih nguntungka bala artis enti isu ‘cetak rompak’
enda ngetu laban CD/VCD sida enda ulih dijual enggau manah”, Rickie Andrewson
mantaika komen diri pasal penusah ke nuntung industry muzik maya ke diatu.
Nyaut Tanya nama jaku
perangsang iya ngagai kitai Dayak ke makin mayuh numbuhka studio rikut kediiri,
Rickie Andrewson meransang enda ngasuh sida nya mantul ngapa betapi enggau
sebarang penguji. “ Aku berasai temegah laban diatu kitai udah ulih ngatur
anugerah (gelar) dikena meri tanda kelala ngagai pemanah asil pengawa bala
artis. Kelimpah ari nys, peluang endur merindang mega makin mayuh lalu nya tau
bendar nyungkak penatai pemisi artis kitai” Rickie Andrewson agi mantaika
pengaga enggau pengarap diri.
Ba aku penemu Rickie Andrewson
nya siti fakta ke ending sigi iya betul laban enti dunya pemerindang kitai
majak mansang, majak mujur sereta nadai mayuh penekul, dia artis kitai mayuh
agi peluang endur merindang baka ba funfair, rami korporat, panggau pemerindang
ke diatur opis pemerintah tauka swasta enggau aktiviti bukai ti diadaka
sepemanjai taun. Peluang ke bansa nya chukup beguna ba sida ke nadai pun
penatai pemisi ke tetap tauka sida ke semina ngarapka asil ari pengawa belagu.
Nama Isu Angat ba Industri Maya ke Diatu?
“Munyi ke udah bisi kena sebut
aku tadi, isu ke pemadu angat maya ke diatu iya nya isu ‘cetak rompak’. Aku
arapka semua orang ke megai kuasa ulih bejalaika tanggungjawap sida enggau
terit laban enti sida agi kerangah, aktiviti niru CD/VCD makin nyadi. Pengawa
nya tetap salah ari segi undang-undang. Semadi jaku beambi ulih, aktiviti
‘cetak rompak’ enda ulih padam ngapa enti kitai agi nyukung iya. enti ulih,
aram meh kitai sama ngelaungka (boikot) orangka nyual Cd/VCD tiru ngena jalai
meli CD/ VCD ke tulin”, Rickie Andrewson sekali agi ngelalau peminat lagu Iban
enda meli CD/VCD tiru.
Anugerah
Muzik Dayak (AMD) 2012
Anugerah
Muzik Dayak (AMD) 2012 deka diatur malam tu lagi (Hari Enam) 24 November 2012
ba DeTAR Putra Unimasberengkah ari pukul 7.00 lemai. Ari dua puluh kategori ti
dipekitka maya nya, Rickie Andrewson dichalunka ba empat iti kategori – Best Male Album, Best Music Arrangement,
Best Ballad Artiste enggau Best Lyric Album.
Kitai
arapka Rickie Andrewson ukai semina mujur ba anugerah tu tang mujur mega ba
pengawa iya ke nyadi artis, rumah tangga iya, kaul iya enggau bala peminat
sereta enggau utai bukai mega.
“Aku
enggai enda meri besai terima kasih ngagai semua peminat aku, composer aku,
penulis lirik, bala DJ radio, DJ pub & karaoke enggau Ricky Jay ke udah
mayuh mantu aku ari segi muzik. Terima kasih mega ngagai kami sebilik lalu aku
arapka artis kitai, muzik kitai enggau lagu kitai betambah manah awakka
industry muzik mega makin nyamai sereta lantang endur kitai ngidupka diri”, ku
Rickie Andrewson ti rinduka pengawa nginti laban pengawa nya ku iya ulih muai
stress laban maya kitai ke nginti tentu kitai sama rindu sama gaga begulai
enggau pangan diri.
Aku
ngarika Utusan Borneo enggau semua pemacha ngarapka semua artis ke enggau masuk
AMD 2012 malam tu legi sama-sana teulihka pemujur lalu serebak enggau nya
terima meh ‘hakikat’ ukai semua orang menang lalu enda semua mega alah. Utai ke
ulih nuan nyerminka pengerajin enggau pemanah asil pengawa nuan ngelama tu lalu
kitai semina bedaya beserah ba nasit enggau jereki ke udah gerinti ukai 100
persin datai ari kuasa kitai. Sukung
meh industry pemerindang di menua tu!!
Dikarang: Isa Lee (apaimit@yahoo.com)
Sumber: Utusan Borneo (24 Nov 2012)
Sumber: Utusan Borneo (24 Nov 2012)
